Black childhood

Har ek insaan ke zindagi ka pehla stage bachpan hota hai. Wahi bachpan jo logon ko sikhaati hai, hasaati hai, behlaati hai, lekin kehte hai na ki sabki bachpan ki yaadein phoolon ki tarah khili hui nahi rehti, kisi ki kaanto ki tarah gambhir v hoti hain. Mera bachpan v kaanto jaisa hi tha, na toh padhne ka mann krta tha na hi khelne ka, bas chup chaap baithi rehti thi akele, bas sochti thi ki koi toh mera dost ban jaayein, koi mujhe saamne se aake bole - suno meri dost banogi? Par esa kam hi hota tha . Main humesha dusre bacchon ko dekhkar socha krti thi main esi kyu nhi? Mera bhi toh esa rehne ka haq hai, fir main kyun nhi? Kaafi mushkil ho jaata tha ye sb baatein khud se hi karna aur khud se hi sawaal krna, lekin sach toh yeh tha ki kabhi mujhe wesa banaya hi nhi gya, toh fir main baaki bacchon jaisi hoti bhi kaise? Logon ko kadwa lagta hai jab ye baat kahi jaati hai ki - Bacchon ko padhane ke liye parents ka bhi padha likha hona important hota hai, thoda dukh lagta hai lekin bhut sach hota hai ye, aur ye baat bhi kuch bacche hi samajh paayenge, jo mere jaise honge. Jin parents ko pata hota hai ki bacchon ko book ke language padhane se pehle unhe love language padhana chahiye wohi asli padhayi hain, kyunki bacchon ko ye nahi pata hota hai ki nafrat kya hoti hai, baahar ki duniya kya hai, unhe saari cheezein pyaar se samjhaani hoti hai, lekin kuch parents ko lagta hai ki sirf bacchon ka school me admission kra dene se hi sab ho jaata hai, unhone kabhi bacchon ki mann ki baatein janne ki koshish hi nhi kari na hi unhe solve krne ki koshish ki. Mein apni zindagi ki experience ke hisaab se bolun toh agar parents ke rishte main agar pyaar, care ho toh bacchein bhi khud bhut kuch observe krke seekh lete hai, lekin afsos mere ghar mein esa nhi tha mujhe humesha jhagde, aur unchi awaajein sunne ko milti thi, humesha conflicts, esa lagta tha ab yhi zindagi hogyi hai. Ek samay toh esa aa jata tha ki ab main khud se hi kehti thi - pls ab mujhse ye sab nhi suna jayega, mujhe yaha se le chalo, main raat bhar jagti, paseene se latpat, sochti rehti - lagta hai koi aa rha hain, fir se jhagade honge, fir se main pareshaan ho jaaungi. Raat-bhar sochte sochte jab roshni ki kiran dikhti thi tab mujhe esa feel hota tha ab main thoda rest kr skti hun. Jaayaz hain ki jab ghar ka maahol esa ho toh bacchon ka personality trauma response hi hoga, aur kab meri ye saari black memories trauma aur anxiety mein badal gayi mujhe khud hi pta nahi chala.. Parents ko ye dhyaan rakhna chahiye ki agar hum ek massom se jaan ko iss duniya mein laate hai toh usse basic khushiyaan dein kyunki basic hi wo power banta hai jisse bacchon ko himmat milti hai kuch bada krne ki kyunki agar mental health shi hai toh sab shi hai. Aur bsss yhi hain meri bachpan ki yaadein kaanton si teekhi, yun humesha sataati hai, kyu puraane jakhmo to taaza kar jaati hai..