Raat ke 12 baje the. Gaon ke bahar ek purana khandhar khada tha, jise dekhkar log dur se hi dar jate the. Din me bhi wahan koi nahi jata tha, aur raat ke samay to bilkul bhi nahi. Log kehte the ki us jagah par kuch ajeeb hota hai, aur jo bhi wahan gaya, uska wapas aana mushkil hota hai.
Gaon ke buzurg aksar bachchon ko warn karte the, "Us khandhar ke paas kabhi mat jana. Wahan ek darwaza hai jo andhere ki duniya tak jata hai."
Zyadatar log ise sirf kahani samajhte the, lekin Aarav ko adventure aur mystery ka junoon tha. 17 saal ka Aarav har kahani sunte hi apne dimag me bas ek hi sawaal rakhta — kya sach me wahan kuch hai?
Ek raat, Aarav ne decide kiya ki ab woh khud sachai jaane bina nahi rukega. Raat ke 11:45 baje, chupke se ghar se nikla. Gaon bilkul shaant tha, sirf hawa ki halki si awaaz aa rahi thi. Usne apna mobile nikala aur torch on kiya. Dheere-dheere woh khandhar ki taraf badhne laga. Jaise hi woh wahan pahucha, uska dil tez dhadakne laga. Samne woh purani, tooti hui imarat khadi thi, deewar par belen chadh chuki thi, aur hawa chalne par darwaze ki purani lakdi "krrrr…" ki awaaz kar rahi thi.
Aarav ne gehri saans li aur andar kadam rakha. Andar bilkul sannata tha.
Tabhi uski torch ki roshni ek bade, kala darwaze par padi. Woh darwaza baaki sab se alag tha. Us par ajeeb se nishan bane hue the, jaise kisi purani bhasha me kuch likha ho.
Aarav dheere-dheere darwaze ke paas gaya. Darwaze par dhool jam gayi thi. Usne haath se dhool hatayi aur dekha: "Jo andar jayega, woh kabhi pehle jaisa wapas nahi aayega."
Aarav ke haath thode kaanp gaye, aur dil tez dhadakne laga. Ek pal ke liye usne socha ki wapas chale jaye, lekin curiosity usse rok nahi paayi.
Usne dheere se darwaze ko dhakka diya.
Creeeeek…
Darwaza dheere-dheere khul gaya. Andar sirf ghup andhera tha, jaise roshni wahan ghus hi nahi sakti. Aarav ne ek kadam andar rakha.
Tabhi achanak…. DHADAAM!
Darwaza peeche se zor se band ho gaya. Aarav ghabra gaya. Usne turant darwaza kholne ki koshish ki, lekin darwaza hil bhi nahi raha tha.
Andhera aur gehra ho gaya. Tabhi us andhere me ek ajeeb si awaaz gunji…
"Bahut saalon baad… koi insaan yahan aaya hai…". Aarav ka dil zor-zor se dhadakne laga. Usne apne mobile ki torch on ki, aur jo usne dekha, use dekhkar uske pair jam gaye.
Saamne jo khada tha, woh insaan bilkul bhi nahi lag raha tha…
(To be continued…) 😈
💡 Agar tum Part 2 dekhna chahte ho, to apne dosto ke sath share karo! Thank for reading