التسامح:
التسامح مش ضعف ولا نسيان
ولا تنازل عن الكرامة زي ما ناس كتير فاكرة
التسامح هو قوة عقل وطاهرة قلب
قوة إنك تسيب اللي وجعك وتكمّل
من غير ما تشيل في قلبك غلّ وحقد
ولا رغبة في الانتقام لكن معناه إنك تختار تكون أهدى وتكمل طريقك بقلب نضيف.
التسامح مش معناه إنك ترجع تفتح نفس الباب اللي وجّعك
لكن معناه إنك تقفل الباب وانت مبتسم وتقول انا هبدا من جديد مش لأنك نسيت
لكن لأنك قررت ترتاح.
اللي بيسامح مش غبي
ده أذكى من اللي بيفضل شايل الحقد جواه
لأن الحقد بيأكل القلب وبيقصر العمر
وبيخلّي الإنسان تعبان من غير ما يحس.
كلنا ببنتأذى وبنتخدع وبنتخان بنتوجع وبنكسر
وبنشوف ناس كانت غالية علينا تبعد
وساعتها بيكون عندنا اختيارين:
يا نعيش نحقد ونغرق في الوجع ونتقم لنفسنا
يا نختار نسيبها على الله ونرتاح. وربنا يجبلنا حقنا.
وده هو الفرق بين اللي بيتقدّم في حياتة
واللي واقف في نفس المكان حابس نفسه في الغضب والانتقام.
التسامح قوة
قوة إنك تقدر ترد الأذى وتختار متعملش كده،
قوة إنك تبص لقدّام، مش لورا.
الناس اللي بتعرف تسامح هم أكتر ناس قلوبهم رايقة ودماغهم مرتاحة.
لأنهم ما بيسيبوش الحزن يعشش فيهم
ولا بيخلّوا الماضي يعطّلهم.
التسامح مش سهل،
خصوصًا لما اللي وجعك كان قريب منك حبيب قريب صديق اخ بيبقا الوجع اكبر والضربة تموت
لكن كل مرة تسامح فيها،
قلبك بيبقى أخف،
وروحك بتقوى،
وإيمانك يزيد.
ربنا نفسه غفور رحيم،
يسامح عبده رغم كل تقصيره،
فإزاي احنا كبشر نعيش حياتنا نحاكم الناس ومش قادرين نغفر؟
التسامح كمان مش دايمًا مع الناس،
أوقات لازم تسامح نفسك الأول،
على غلط عملته، أو طريق اختارته ومكنش صح،
تسامحها وتقول: "أنا اتعلّمت"، مش "أنا فشلت".
اللي يسامح نفسه يعرف يسامح غيره،
لأن الرحمة بتبدأ من جوّاك.في ناس بتفتكر إن التسامح يعني إنك تبرّر الغلط بس لا
التسامح إنك تفهم إن الغلط حصل،
وتقرر ما تسيبوش يعكّر قلبك.
يعني تقول "خلاص، أنا سامحت"
بس كمان تتعلم وتحط حدود،
عشان ما تتوجعش تاني.
مش سهل تسامح اللي كسرك أو ظلمك،
بس لما تعمل كده، بتحس براحة غريبة،
كأنك طلّعت حجر تقيل من على صدرك،
وبدأت تتنفس من جديد.
والتسامح مش معناه إنك ترجّع اللي أذاك في حياتك،
لكن معناه إنك تبطّل تديّلو مساحة في قلبك،
تسيبه لماضيه، وتكمّل طريقك في سلام. ربنا دايمًا يحب اللي قلوبهم صافية،
اللي يعرفوا يسامحوا من غير تكبر،
لأن التسامح مش بيقلّل منك،
بالعكس، بيرفعك فوق. قدام نفسك بتخلي اللي وجعوك صغيرين اوى قدام نفسهم
وفي النهاية
، التسامح مش هدية بتديها للي ظلمك،
التسامح هدية بتديها لنفسك،
علشان تعيش مرتاح، وتعرف تبتسم من قلبك،
من غير ما يفضل فيك وجع قديم،
ولا كره يسرق منك راحة بالك….