Chapter 1: Ek Chhoti Si Shuruaat:-
Meri zindagi hamesha se aisi nahi thi jaise aaj hai. Aaj jab main peeche mudkar dekhta hoon, toh lagta hai jaise har chhoti galti ne milkar ek aisi kahani bana di jise main chaah kar bhi mita nahi sakta. Log kehte hain ki zindagi decisions se banti hai… par koi ye nahi batata ki galat decisions kitni khamoshi se aapki poori duniya badal dete hain.
Main ek normal ladka tha.
Ek chhota sa ghar, ek simple si family—mummy, papa aur mera chhota bhai. Papa thode strict the, unki baat final hoti thi. Mummy bilkul opposite—pyari, samajhdaar, aur har waqt meri fikr karne wali. Unki duniya simple thi—achha padho, bada aadmi bano, aur hamesha sach bolo.
Aur main?
Main unki umeedon par khara utarne ki koshish karta tha… par andar hi andar main kuch aur hi banna chahta tha.
Mujhe hamesha lagta tha ki meri life boring hai.
Har subah ek hi routine—school jaana, class attend karna, wapas aana, homework, khana, aur phir sona. Har din ek jaisa. Koi excitement nahi. Koi thrill nahi. Kabhi kabhi main apne kamre ki khidki se bahar dekhte hue sochta tha—
"Logon ki life mein itna sab hota hai… meri life mein kyun nahi?"
Shayad wahi meri pehli galti thi… apni normal zindagi ko kam samajhna.
________________________________________
Ek Naya Mod:-
Ek din school mein kuch naye ladke aaye.
Unka andaaz alag tha. Uniform toh same thi, par pehenne ka style alag. Baatein tez, hasi loud, aur aankhon mein ek ajeeb sa confidence.
Teachers bhi unhe dekh kar thoda cautious the.
Main unhe chup chap observe kar raha tha.
Unmein se ek ladka tha—Aarif.
Uski aankhon mein darr naam ki cheez nahi thi. Wo jab bolta tha toh lagta tha jaise use kisi ki parwah nahi. Uska attitude… uski body language… sab kuch alag tha.
Mujhe nahi pata kyun… par main uski taraf attract hone laga.
________________________________________
Wo Pehli Baat:-
Lunch break tha. Main usual ki tarah akela baitha tha.
Tabhi kisi ne meri desk par haath maara.
"Akela kyun baitha hai?" awaaz aayi.
Maine upar dekha—wo Aarif tha.
"Bas… aise hi," maine dheere se kaha.
Wo mere saamne baith gaya.
"Naam kya hai tera?"
"Ariyan…"
"Seedha bol na bhai, darr kyun raha hai?" wo hasa.
Uski hasi mein mazaak tha… par usmein ek ajeeb sa comfort bhi tha.
Us din pehli baar kisi ne mujhe feel karaya ki main bhi important hoon.
Aur shayad wahi meri zindagi ka turning point tha.
________________________________________
Dosti Ya Galti?:-
Agle kuch dinon mein main unke group ka part ban gaya.
Aarif, Sabir, Danish aur Imran.
Unke saath rehkar mujhe lagta tha ki main bhi special hoon. Wo log rules follow nahi karte the. Teachers se darte nahi the. Class bunk karna unke liye normal baat thi.
Main unhe dekh kar impress hota tha.
"Yahi toh hai asli life…" main sochta.
Par mujhe nahi pata tha… ki main dheere dheere ek aise raaste par chal raha hoon jahan se wapas aana mushkil hota hai.
________________________________________
Pehla Kadam Galat Raaste Par:-
Ek din Aarif ne kaha,
"Aaj maths ki class skip karte hain."
Maine turant mana kiya,
"Nahi yaar, pakde gaye toh?"
Wo mere paas aakar dheere se bola,
"Bhai tu bahut seedha hai."
Bas… wahi ek line ne mujhe hila diya.
Seedha.
Ye word mujhe andar tak chub gaya.
Mujhe laga jaise wo mujhe weak keh raha ho.
Aur usi pal maine decide kiya—
"Ab main bhi unki tarah banunga."
Us din maine pehli baar class bunk ki.
Aur sach kahun… mujhe darr ke saath saath ek ajeeb sa excitement bhi feel hua.
________________________________________
Jhoot Ki Aadat:-
Us din ke baad sab kuch badalne laga.
Main roz late aane laga. Kabhi class skip karta, kabhi school ke bahar ghoomta.
Ghar jaakar jhoot bolna shuru kar diya.
"Mummy, extra class thi…"
"Teacher ne roka tha…"
Pehle jhoot bolte waqt guilt hota tha.
Phir dheere dheere… wo normal lagne laga.
Aur mujhe lagne laga ki main smart ho gaya hoon.
Par sach ye tha… main khud se door hota ja raha tha.
________________________________________
Ek Ajeeb Sa Dar:-
Raat ko jab sab so jaate....tab main akela hota.
Aur tab ek ajeeb sa dar mehsoos hota.
Kaise andar se koi keh raha ho----
''Ye sab galat he...''
Par main us awaaz ko ignore karta.
Kyunki nextvday phir Aarif milta....aur main sab bhool jaata.
________________________________________
Wo Din....Jo Sab Badal Gaya:-
Ek din school ke baad Aarif ne mujhe roka.
''Aaj ek kaam hai'',usne kaha.
Uski awaaz serious thi.
''kaisa kaam?'' Maine poocha.
''Simple hai....bas himmat chahiye''.
Mera dil tez dhadakne laga.
''Bhai agar Darr Gaya na....toh phir group mein rehna mushkil ho jayega'', usne seedha keh diya.
Mujhe laga jaise meri dosti daav par lag gayi ho.
Aur main haar nahi maanna chahta tha.
________________________________________
Wo Dukan.....Wo 5 Second:-
Hum school ke pichhe ek choti si dukaan ke pass Gaye.
Aarif ne meri aankhon mein dekhte hue kaha,''Andar ja....aur ek chocolate uthkar bahar aaa ja.''
Maine shock mein poocha,
''Bina paise diye?''
Wo hasa,
''Arey bhai,itna bhi nahi kar sakta?''
Mere hath thande pad gaye.
Dimag chillaya ---''Mat Kar!''
Par ego bola---''Kar warna weak samjhenge.''
Aur maine....ego ki baat sun li.
________________________________________
Meri Pehli Galti:-
Main dheere dheere dukaan ke andar gaya.
Shopkeeper kisi aur mein busy tha.
Maine ek chocolate uthayi.....
Aur bina kuch bole bahar aa gaya
Bas 5 Second
Sirf 5 Second
Par un 5 seconds ne meri zindagi hamesha ke liye badal di.
________________________________________
Andar Ka Tootna:-
Bahar aate hi sab hasne lage.
''Ab tu Banda ban gaya!''Aarif ne kaha.
Sab celebrate kar rahe the.
Par main chup tha.
Mere haath mein chocolate this....par dil mein bojh.
Mujhe kag raha tha jaise Maine apni imaandari kho di.
________________________________________
Wo Raat.....Jo Kabhi Nahi Bhoolunga:-
Us raat main so nahi paya.
Bar bar wahi scene dimag mein aa raha tha.
Mummy ki awaaz------
''Beta hamesha sach bolna''
Papa ka chehra.....
Aur main.....jhoot ke peeche chhupa hua.
Mujhe lag raha tha jaise main so log ban gaya hoon------
Ek Jo Ghar walon ke saamne hai....
Aur ek Jo sach mein hoon----
________________________________________
Kuch Toh Galat tha.....
Agli subhah main school Gaya.
Sab normal lag raha tha.
Par jaise hi main gate ke pass pahucha.....meri nazar ek aadmi par padi.
Wo dukaan wala tha.
Uski aankhen seedha mujhe dekh rahi thi.
Meri dil ek second ke liye ruk gaya.
Kya usne mujhe pehchaan liya tha?
Main jaldi se andar chala gaya
Class mein baitha....par dhyan kahin aur tha.
Tabhi peon aaya aur bola----
''Ariyan.... principal office mein Bulaya hai.''
Mere haath kaap ne lage.
Dil itni tez dhadak raha tha jaise abhi bhar aa jayega.
Maine dheere se khud se kaha-----
''Bas....ab sab khatam.''
Main dheere dheere office ki taraf badha....
Darwaza aadha khula tha....
Andar se awaaz AA Rahi thi----
''Ji Haan,ye ladka wahi he...''
Maine darwaza ko dhakka diya....
Aur jaise hi andar dekha-----
Mera khoon jam gaya.....
________________&&&&&________________
👉Aage janne ke liye chapter 2 kal dekhein dophar 3:30 baje...