Aaj subah aankh usual se bahut jaldi khul gayi.
Maine phone uthaya aur sabse pehle result wali website check ki.
Abhi bhi "Result will be declared soon" likha aa raha tha.
Dil ki dhadkan already fast thi.
Mummy kitchen me thi aur unhone poocha,
"Result aaj aane wala hai na?"
Maine sirf dheere se kaha,
"Haan…"
Unki awaaz me trust tha, lekin mere andar sirf darr tha.
Papa kaam par jaane se pehle bole,
"Jo bhi result ho, tension mat lena. Mehnat important hoti hai."
Unki ye baat sunke thoda relief mila, par tension fir bhi kam nahi hui.
Subah se lekar dopahar tak maine phone kitni baar check kiya, iska count hi nahi tha.
Kabhi website khulti nahi, kabhi error aa jata.
Har baar lagta—
"Bas ab khul jaye…"
Mere friends ke messages aane lage.
Ranveer: "Bhai result check kiya?"
Vishu: "Mera toh open hi nahi ho raha."
Sumit: "Tension ho rahi hai yaar."
Mujhe thoda acha laga ki sirf main hi nervous nahi hu.
Finally dopahar ke around website khul gayi.
Mere haath kaanp rahe the jab maine roll number type kiya.
Ek second…
Do second…
Phir screen load hui.
Us waqt laga jaise pura room silent ho gaya ho.
Maine aankhen band karke result open kiya.
Aur…
PASS.
Meri saans ekdum se normal hui.
Main kuch seconds tak bas screen ko dekhta raha.
Marks utne ache nahi the jitni hope thi, but main fail bhi nahi hua tha.
Mere chehre par automatically smile aa gayi.
Mummy ko jaake bataya:
"Pass ho gaya…"
Unhone turant smile ki aur bola,
"Dekha, itna tension le raha tha."
Papa ko call kiya toh unhone sirf itna kaha:
"Good. Ab next class pe focus karo."
Unka simple sa reply bhi mere liye bahut important tha.
Shaam ko hum teeno dost mile.
Ranveer excited hokar bola,
"Bhai mujhe engineer banna hai, isliye main science PCM lunga."
Vishu ne haste hue kaha,
"Mera goal clear hai, mujhe IAS banna hai."
Fir teesra dost bola,
"Mujhe toh bas cricket me kuch bada karna hai."
Main bas unki baate sun raha tha.
Sabke paas apna dream tha.
Aur main?
Main fir se confused ho gaya.
"Mujhe life me banna kya hai?"
Result ka darr khatam hua hi tha…
Aur life ne ek nayi tension mere saamne rakh di.
Shayad asli journey ab start hone wali thi.