"Mera naam Aayat hai…
Haan… main hi hoon Aayat…
Main ek Muslim family me paida hui hoon…
Jahan beti ko rehmat maana jata hai…
Behen ko dua…
Biwi ko sukoon…
Aur maa… maa to jannat hoti hai…
Meri zindagi ki kahani sirf ek kahani nahi hai… balki ek aisi sachchai hai jo ye batati hai ki zindagi kaise jee jaati hai… aur kaise ek rani dheere-dheere nokrani ban jaati hai…"
Main 6 bhaiyon ki eklauti behen hoon… aur 3 maa, 3 baap ke beech pali ek beti…
Meri zindagi shuru se hi thodi alag thi…
Aur meri kahani shuru hoti hai ek thandi raat se…
10 December ka din tha… sardi apne poore zor par thi. Thand itni zyada thi ki saans lena bhi mushkil lag raha tha. Us din mera janm kisi hospital me nahi, balki mere apne ghar me hua tha…
Lekin shayad meri zindagi ki mushkilein usi pal se shuru ho chuki thi…
Jab main paida hui, to ghar me ek ajeeb si khamoshi chha gayi thi. Na mere rone ki awaaz aayi… na hi koi harkat…
Logon ko laga ki shayad main zinda hi nahi hoon…
Do ghante tak main bilkul chup thi… jaise koi jaan hi na ho mujh mein…
Meri maa ka dil ghabra raha tha, ghar wale pareshan the…
Phir kisi ne kaha ki aag jalao… thand bahut zyada hai…
Mujhe aag ke paas laya gaya… meri chhoti si body ko garam kiya gaya…
Aur phir… kisi ne mere gaal par halka sa thappad maara…
Aur usi pal… meri zindagi ki pehli awaaz nikli…
Main zor-zor se royi…
Shayad us din maine sirf rona hi nahi, balki jeena bhi shuru kiya tha…
Us pal ke baad ghar me khushi laut aayi…
Meri maa ki aankhon me aansu the… lekin wo aansu dard ke nahi, sukoon ke the…
Main apne ghar ki chhoti si pari ban chuki thi…
Mere do bade bhai the…
Aur main unki sabse pyari cheez thi…
Sach kahun to main unki behen kam, unka khilona zyada thi…
Wo mujhe itna pyaar karte the ki har waqt mere aas-paas hi rehte the…
Mujhe hasaana, mere saath khelna, mujhe god me uthana… jaise unki duniya sirf mere aas-paas hi ghoomti thi…
Mere abbu Mumbai jaise bade shehar me kaam karte the…
Wo ghar se door rehte the, lekin unka pyaar kabhi kam nahi hua…
Jab bhi wo ghar aate, mere liye chhoti-chhoti cheezein lekar aate…
Aur mujhe apni baahon me utha kar bas dekhte rehte…
Meri ammi…
Wo to meri duniya thi…
Unka pyaar itna gehra tha ki agar mujhe zara si bhi kharoch aa jaati… to sabse zyada dard unhe hota tha…
Wo turant ro padti thi… jaise chot mujhe nahi, unhe lagi ho…
Sirf itna hi nahi…
Main apne dadi-dada ki bhi rajdulari thi…
Unki sirf do betiyan thi… jo pehle hi shaadi karke apne ghar chali gayi thi…
Aur jab main paida hui… to unhe laga jaise unhe ek beti phir se mil gayi ho…
Main unki aankhon ki thandak thi…
Unki sabse pyari bachchi…
Aur meri badi buwa…
Unke bhi sirf bete hi the… koi beti nahi thi…
To main hi thi sabki pyari… sabki laadli…
Sabki chhoti si rani…
Sach me… main kisi rani se kam nahi thi…
Ghar me agar kisi ko koi dard hota… to sab usse bhool jaate…
Lekin agar mujhe zara sa bhi kuch ho jaata… to poora ghar sirf mujhe hi dekhne lagta…
Mujhe kabhi kisi cheez ki kami mehsoos nahi hui…
Na pyaar ki… na khushi ki…
Mera bachpan bilkul ek khubsurat sapne jaisa tha…
Main jab thodi badi hui… to maine apni padhai shuru ki…
Mera school koi bada ya modern school nahi tha…
Wo ek madrasa tha… jo mere ghar ke bilkul paas tha…
Wahin se maine apni padhai ki shuruaat ki… class 1 se lekar class 5 tak…
Mujhe aaj bhi yaad hai wo din…
Subah jaldi uthna… taiyaar hona… aur chhota sa bag lekar madrasa jaana…
Mujhe padhai se dar nahi lagta tha…
Balki mujhe wahan jaana accha lagta tha…
Lekin sach ye hai…
Mera asli sukoon mere ghar me hi tha…
Mere apne log… mera parivaar…
Jahan mujhe itna pyaar milta tha ki kabhi kisi aur cheez ki zarurat hi mehsoos nahi hui…
Aur phir… meri zindagi me ek aur khushi aayi…
Mere janm ke lagbhag 3 saal baad…
Mere ghar ek aur chhota mehmaan aaya…
Mera chhota bhai…
Us din mujhe aisa laga jaise Allah ne mujhe duniya ki saari khushiyan ek saath de di ho…
Ab hum teen bhai-behen ho gaye the…
Aur mera bachpan aur bhi khubsurat ho gaya tha…
Mere liye wo waqt meri zindagi ka sabse haseen hissa tha…
Jahan na koi dar tha… na koi gham…
Bas pyaar tha…
Apnapan tha…
Aur ek aisi khushi thi… jise main aaj bhi yaad karke muskurati hoon…
Lekin… shayad zindagi hamesha ek jaisi nahi rehti…
Aur mujhe nahi pata tha…
Ki ye khushiyon bhara bachpan…
Ek din sirf ek yaad ban kar reh jayega…"
👉 "Ye meri zindagi ka sach hai… agar aapko meri kahani feel hui ho to comment karke zarur bataye Next part ke liye intezar rahega…".