Mera naam ek aam insaan ka naam hain. Main koi bada aadmi nahi hoon, nahi koi famous Shaksiyat. Lekin meri zindagi ki kahani bhi kisi film se kam nahi hai. Is kahani main khushi bhi hain, dard bhi hain, sapne bhi hain aur dhoke bhi. Har insaan ki tarah meri zindagi bhi utar-chadhav se bhari hui hain.
Mera janm ek chhote se gaon mein hua tha. Charo taraf hariyali, kheton ki mehak, aur logon ke chehre par saadgi thi. Bachpan ke din bahut pyare hote hain, aur mere bachpan ke din bhi bilkul waise hi the. Main apne doston ke saath khelta tha, nadi ke paas ghumta tha, aur kabhi kabhi pedon per chadhkar aam todta tha.
Mere pita ek mehnati insaan the. Woh hamesha mujhe ek baat sikhate the, "Beta, zindagi mein mehnat se bada koi raasta nahi hota." Us waqt mujhe unki baat ka matlab poori tarah samajh nahi aata tha, lekin aaj jab main peeche mudkar dekhta hoon, to lagta hain ki woh bilkul sahi kehte the.
Meri maa bahuti pyaari aur samajhdaar aurat thi. Woh hamesha chahti thi ki main padh likhkar ek accha insaan banu. Jab mein school jaata tha, to woh mere liye subah jaldi uth kar khana banati thi. Kabhi kabhi jab main school nahi jaana chata tha, to woh pyar se samjha kar mujhe bhej deti thi.
School ke din ajeeb the. Kabhi teacher se dant padti thi, kabhi dost ke saath shararat hoti thi. Lekin wohi din the jahan se sapne shuru hote hain. Main bhi sapne dekhta tha — ek acchi zindagi ka, apne maa-baap ko khush dekhne ka.
Jaise jaise mein bada hone laga, zindagi ke rang badalne lage. Dosti aur pyar ka matlab samajh mein aane laga. Kuch log meri zindagi mein aaye jo mere bahut kareeb ban gaye. Main un per aankh band karke bharosa karta tha. Lekin zindagi har waqt waisi nahi hoti jaisi hum sochte hain.
Ek waqt aisa bhi aaya jab mujhe pehli baar dhoka mila. Jis insaan ko mein apna sabse kareeb dost samajhta tha, usne hi mera bharosa tod diya, us din mujhe samajh aaya ki zindagi sirf khushiyon ka naam nahi hai. Dard bhi iska ek hissa hai.
Us raat main bahut der taak akela baitha raha. Maine socha ki kya sach mein log itni aasani se badal jaate hain? Kya sach mein kisi par poora bharosa nahi karna chahiye? Yeh sawal mere dimaag mein baar baar ghoom rahe the.
Lekin phir mujhe apne pita ki baat yaad aayi — "zindagi mein girna galat nahi hai, lekin girkar ruk jaana galat hai."
Us din maine faisla kiya ki main apni zindagi ko kisi aur ke dhoke se khatam nahi hone dunga. Main aur zyada mehnat karunga, aur aapne sapno ko poora karunga.
Yahi se meri zindagi ka asli safar suru
To be continued....